തിരുവനന്തപുരം: ശബരിമല സന്നിധാനവുമായി ബന്ധപ്പെട്ട സ്വർണ്ണാഭരണങ്ങൾ മോഷണം പോയ സംഭവത്തിൽ പ്രതികരിച്ച് മന്ത്രി വി.എൻ. വാസവൻ. കേസിൽ ഉൾപ്പെട്ട മുഖ്യപ്രതിയായ ഉണ്ണികൃഷ്ണൻ പോറ്റിയുമായി തനിക്ക് യാതൊരു പരിചയവുമില്ല എന്നും, ഒരു സന്ദർഭത്തിൽ പോലും നേരിട്ട് സംസാരിച്ചിട്ടില്ലെന്നും മന്ത്രി വ്യക്തമാക്കി. കേസ് പൊതുജന ശ്രദ്ധയിൽ വന്നതിനു ശേഷമാണ് ഉണ്ണികൃഷ്ണൻ പോറ്റിയെക്കുറിച്ച് താൻ അറിയുന്നതെന്നും മന്ത്രി കൂട്ടിച്ചേർത്തു.
ശബരിമലയിലെ മോഷണക്കേസിൽ ശക്തമായ നിലപാടാണ് സർക്കാർ സ്വീകരിക്കുന്നത് എന്നും മന്ത്രി വി.എൻ. വാസവൻ അറിയിച്ചു. തെറ്റ് ചെയ്ത ഒരാളും ഈ കേസിൽ രക്ഷപ്പെടാൻ പാടില്ല. കേസിൽ കർശന നടപടി സ്വീകരിക്കും.
"എനിക്ക് അന്ന് ഉണ്ണികൃഷ്ണൻ പോറ്റിയെ പരിചയമില്ല, ഒരു സന്ദർഭത്തിൽ പോലും നേരിട്ട് സംസാരിച്ചിട്ടില്ല. ഈ കേസ് വന്നതിൽ പിന്നെയാണ് അറിയുന്നത്. തെറ്റ് ചെയ്ത ആരും രക്ഷപ്പെടാൻ പാടില്ല. ഒരു തരി പൊന്ന് പോയാൽ അത് ശബരിമലയിൽ തിരിച്ച് കൊണ്ടുവെപ്പിക്കും," എന്നായിരുന്നു മാധ്യമങ്ങളോട് മന്ത്രി വി.എൻ. വാസവന്റെ പ്രതികരണം.
നഷ്ടപ്പെട്ട സ്വർണ്ണം എത്രയും വേഗം തിരിച്ച് സന്നിധാനത്ത് എത്തിക്കാനുള്ള എല്ലാ നടപടികളും സർക്കാർ സ്വീകരിക്കുമെന്നും, ശബരിമലയുടെ പവിത്രത കാത്തുസൂക്ഷിക്കാൻ പ്രതിജ്ഞാബദ്ധമാണെന്നും മന്ത്രി ഉറപ്പുനൽകി. പ്രതികളെ സംരക്ഷിക്കില്ലെന്നും, നിയമം അതിൻ്റെ വഴിക്ക് പോകുമെന്നും മന്ത്രി വ്യക്തമാക്കുകയും ചെയ്തു.
